WTA ადელაიდა - ნახევარფინალური წყვილები ცნობილია

ადელაიდაში მიმდინარე WTA-ს 500-ანი რანგის ტურნირი დასასრულს უახლოვდება. დღეს, 25 თებერვალს მეოთხედფინალური მატჩები გაიმართა და საუკეთესო ოთხეულმა ტიტულისკენ მორიგი ნაბიჯი გადადგა.

ყველაზე დაძაბული დღის პირველი დაპირისპირება გამოდგა, რომელშიც ერთმანეთის პირისპირ მსოფლიოს 56-ე და 61-ე ჩოგნები წარსდგნენ და ნახევარფინალის საგზური რეიტინგში უფრო დაბალ საფეხურზე მდგომმა, ჯილ ბელენ ტიჩმანმა მოიპოვა. შვეიცარიელმა ჩოგბურთელმა ანასტასია სევასტოვა სამ სეტში - 6:4; 6:7; 7:5 დაამარცხა. 

ნახევარფინალში ტიჩმანის მეტოქე მსოფლიოს მე-18 და ტურნირზე მე-5 ნომრად განთესილი ჩოგბურთელი, იგა შვიონტეკი იქნება. როლან გაროსის მოქმედი ჩემპიონი ადელაიდაში გამოსვლას სეტის წაუგებლად განაგრძობს. მეოთხედფინალში პოლონელის მეტოქე დანიელა როუზ კოლინსი გახლდათ, რომელმაც მერვედფინალში პირველი ჩოგანი, ეშლი ბარტი დაამარცხა. თუმცა, უნდა აღინიშნოს, რომ კოლინსმა ტრავმის გამო თამაშის დასრულება ვერ შეძლო და მატჩი მეორე სეტში, მესამე გეიმის (2:6; 0:3) შემდეგ შეწყვიტა.

🇵🇱 @iga_swiatek strikes first! ⚡️

Big backhand to seal the opening set, 6-2.#AdelaideTennis pic.twitter.com/ntHtH12x3r

— wta (@WTA) February 25, 2021

მეორე ნახევარფინალურ დაპირისპირებაში ერთმანეთს 16 წლის ამერიკელი ჩოგბურთელი, კორი გაუფი და ტურნირის მეორე ნომერი, ბელინდა ბენჩიჩი შეხვდებიან.

მეოთხედფინალში თინეიჯერმა ამერიკელმა შელბი როჯერსი დაამარცა. მიუხედავად იმისა, რომ კოკომ პირველი სეტი 2:6 დათმო, თამაშის შემობრუნება შეძლო, მომდევნო ორი პარტია ერთნაირი ანგარიშით - 6:4; 6:4 მოიგო და ამ გამარჯვების შემდეგ, WTA-ს ერთეულთა თანრიგის რეიტინგში 52-ედან 38-ე პოზიციამდე დაწინაურდება, რაც მის კარიერაში ამ ეტაპისთვის უმაღლესი საფეხური იქნება.

რაც შეეხება ბელინდა ბენჩიჩს, შვეიცარიელმა ჩოგბურთელმა შტორმ სანდერსს ორ სეტში მარტივად - 6:2; 6:4 სძლია.

ადელაიდას ტურნირის ნახევარფინალური მატჩები 27 თებერვალს გაიმართება და ორივე შეხვედრა თბილისის დროით დილის 04:30 საათზე დაიწყება. 

Swiss Misses and Teenagers make up the @AdelaideTennis Final Four:

[5] Swiatek vs. Teichmann
[2] Bencic vs. Gauff#AdelaideTennis pic.twitter.com/Da2bOuvc9h

— WTA Insider (@WTA_insider) February 25, 2021