ახალგაზრდა ქართველმა ჩოგბურთელმა, მარიამ ბოლქვაძემ საკვალიფიკაციო ეტაპის წარმატებით დაძლევის შემდეგ, ამერიკის ღია პირველობის ძირითად ბადეში პირველი მატჩი გამართა.

ბოლქვაძე პირველსავე წრეში ამერიკელ ბერნარდა პერას დაუპირისპირდა. მარიამს ამერიკელი ჩოგბურთელის წინააღმდეგ რთული მატჩი გამოუვიდა და ორ საათსა და 20 წუთში იმარჯვა. ქართველმა ჩოგბურთელმა მეტოქეს პირველ სეტში მარტივად, 37 წუთში ანგარიშით 6:3 მოუგო. მეორე სეტში ბოლქვაძე მატჩზე აწვდიდა, თუმცა პერამ თამაშის შემოტრიალება მოახერხა და 7:5 იმაჯვა. გადამწყვეტ მესამე სეტში კი მარიამმა პირველივე ჩაწოდება დათმო, ამერიკელი ჩოგბურთელი კი წინ ბრეიქით გავიდა. მარიამმა თამაშში დაბრუნება მოახერხა, მეტოქეს საპასუხო ბრეიქი გაუკეთა და ანგარიში გაათანაბრა. მესამე სეტი ყველაზე დაძაბული გამოდგა. გარდამავალი თამაში საბოლოოდ ბოლკვაძის გამარჯვებით, ანგარიშით 6:3; 5:7; 6:4 დასრულდა.

მეორე წრეში მარიამს საკმაოდ რთული მეტოქე ჰყავს. ახალგაზრდა ქართველი ჩოგბურთელი მსოფლიოს მესამე ჩოგანს, კაროლინა პლიშკოვას დაუპირისპირდება.

მარიამმა მსოფლიო რეიტინგში საკვალიფიკაციო ეტაპის დაძლევისა და მეორე ტურში გასვლისთვის ჯამში 105 ქულა გამოიმუშავა. ქართველი ჩოგბურთელი "ცოცხალ რეიტინგში" 51 პოზიციით დაწინაურდა და ამჟამად მსოფლიოს 151-ე ჩოგანია.

ცნობისთვის, კიდევ ერთი ქართველი, ერთეულთა თანრიგში ამერიკის ღია პირველობაზე, ნიკოლოზ ბასილაშვილია, რომელიც ამ წუთებში მატჩს მარტონ ფუჩოვიჩის წინააღმდეგ მართავს და სამი სეტის შემდეგ 2:1-ს იგებს. ქალთა წყვილთა თანრიგში კი ოქსანა კალაშნიკოვა თავის მატჩს 28 აგვისტოს გამართავს.

მარიამ ბოლქვაძე ამერიკის ღია პირველობის მეორე წრეში გავიდა

ასევე იხილეთ

უახლესი ამბები