უკვე მოგახსენეთ, რომ ტოკიოში მიმდინარე პარალიმპიურ თამაშებზე, საქართველოს სახელით პირველ სექტემბერს საქმეში სამ პარასპორტსმენს ვიხილავდით. პარამძლეოსნობაში დავით ქავთარაძემ სიგრძეზე ხტომაში იასპარეზა. მისი საუკეთესო მაჩვენებელი მესამე ცდაზე დაფიქსირდა – 5,76 მეტრი. ეს მედლის მოსაპოვებლად საკმარისი არ აღმოჩნდა. ის მე–12 ადგილზე გავიდა.

პარასროლა – ლადო ჭინჭარაულმა ათ მეტრზე პნევმატული შაშხანით (დახლზე დაყრდნობით) სროლაში დისკვალიფიკაცია მიიღო. შესაბამისად, ის ცხრილში უქულოდ იმყოფება.

პარაცურვა – წარმატების მიღწევას ნიკა თვაური შეეცადა, რომელმაც 100 მეტრის დისტანციაზე ბრასით გაცურა. მას ამ მანძილის დასაფარად 26,82 წამი დასჭირდა. ეს კი იმას ნიშნავს, რომ მეექვსე (ბოლო) პოზიცია დაიკავა.

ამ მომენტისთვის ქართული დელეგაციის ანგარიშზე სამი მედალია. ვერცხლის მედლის მფლობელები ინა ქალდანი, ნინო თიბილაშვილი და რევაზ ჩიკოიძე გახდნენ.

აქვე მოგახსენებთ, რომ ლადო ჭინჭარაული ოთხ სექტემბერს, R9 კატგოიაში 50 მეტრზე სროლით საქართველოს პარალიმპიური ნაკრების გამოსვლას ტოკიოს ზაფხულის პარალიმპიურ თამაშებზე დახურავს.

პირველი სექტემბერი – ქართველი პარალიმპიელების შედეგები

დღეს საქართველოს სამი წარმომადგენელი ჰყავს

უახლესი ამბები