2021/22 წლების ევროპული საფეხბურთო სეზონი დასასრულისკენ მიდის. 18 მაისს, სევილიას "რამონ სანჩეს პისხუანმა" ევროპა ლიგის ფინალს უმასპინძლა, სადაც ერთმანეთს აინტრახტი და რეინჯერსი დაუპირისპირდნენ.

აინტრახტმაც და რეინჯერსმაც მიმდინარე ევროპული სეზონი ევროპა ლიგაზე დაიწყეს. გერმანელები გათამაშებას ჯგუფური ეტაპიდან ჩაერთვნენ. ხოლო, შოტლანდიელებს საკვალიფიკაციო ეტაპის გავლაც მოუხდათ.

ფრანკფურტულმა კლუბმა ევროპა ლიგის 2021/22 წლების სეზონში D ჯგუფში იასპარეზა და კონკურენცია ოლიმპიაკოსს, ფენერბაჰჩესა და ანტვერპენს მოუგო და ფლეი ოფში პირველი ადგილით გავიდა, რამაც გერმანელებს უპირატესობა მისცა, რომ გადამწყვეტ ეტაპზე მეორე რაუნდიდან ეთამაშათ. 1/8-ფინალში აინტრახტმა რეალ ბეტისი დაამარცხა, ხოლო მეოთხედფინალიდან ტურნირს კატალონიის ბარსელონა გამოთიშა. ნახევარფინლში კი ვესტ ჰემს სძლია და ტიტულს კიდევ ერთი ნაბიჯით მიუახლოვდა.

რეინჯერსმა საკვალიფიკაციო ეტაპზე სომხური ალაშკერტი დაამარცხა და წილისყრის შემდეგ, A ჯგუფში მოხვდა, სადაც მასთან ერთად ლიონი, პრაღის სპარტა და ბრონდბიუ გამოდიოდნენ. საბოლოოდ, კი შოტლანდიური კლუბი მეორე ადგილზე გავიდა და ფლეი ოფში თამაშის უფლება მოიპოვა. 1/16-ფინალში გლაზგოელებმა დორტმუნდის ბორუსიას მოუგეს. შემდეგ კი ტურნირს ცრვენა ზვეზდა, ბრაგა და ლაიპციგი გამოთიშეს.

რაც შეეხება უშუალოდ ფინალურ მატჩს, აინტრახტის უპირატესობით დაიწყო. მე-11 წუთზე, დაიჩი კამადას საკმაოდ კარგი მომენტი შეექმნა, რომელიც მაკგრეგორმა მოიგერია. მე-20 წუთზე ალან მაკგრეგორმა კნაუფს აუღო და მისი დარტყმული კუთხურზე მოიგერია.

რეინჯერს პირველი რეალური სახიფათო 26-ე წუთზე შეექმნა, როდესაც არიბომ საჯარიმოს გარედან მოჭრილი ბურთი გაუშვა და კარს მცირე მანძილით ააცილა.

ამის შემდეგ, მომენტები კვლავ აინტრახტს შეექმნა. 30-ე წუთზე კოსტიჩის დარტყმულმა ძელს ახლოს ჩაუარა.

მეორე ტაიმიც ფრანკფურტელთა აქტიურობით დაიწყო. 52-ე წუთზე, მსაჯმა, სლავკო ვინჩიჩმა, რაფაელ ბორეს წინააღმდეგ თამაშის დროს, საეჭვო ეპიზოდში პენალტი არ დანიშნა.

55-ე წუთზე კი, სოუმ თავით უხეიროდ ითამაშა, რასაც არიბოს მიერ გატანილი გოლი მოჰყვა. სოუს შეცდომის გამოსწორება, ვერც ტუტამ და ვერც ნდინკამ მოახერხა.

შოტლანდიელებმა უპირატესობის შენარჩუნება ვერ მოახერხეს და 12 წუთში ბურთი გაუშვეს. ფილიპ კოსტიჩმა მარცხენა ფლანგიდან რაფაელ ბორე მონახა, რომელმაც ანგარიში გაათანაბრა. გატანილი გოლის შემდეგ, ლინდსტრომს ფრანკფურტული კლუბის დაწინაურება შეეძლო, მაგრამ მისი დარტყმული ბურთი, რეინჯერსის ფეხბურთელს მოხვდა და კარს მცირე მანძილით აცდა.

საბოლოოდ, მატჩის ძირითადმა დრომ გამარჯვებული ვერ გამოავლინა და თამაში დამატებით დროში გადავიდა.

95-ე წუთზე, ბეისიმ შეცდომა დაუშვა, მაგრამ ამით ბორემ ვერ ისარგებლა და რეინჯერსის მცველმა, საკუთარი შეცდომა თავადვე გამოასწორა.

106-ე და 107-ე წუთზე, გუნდებმა მომენტები გაცვალეს. ჯერ, ბარიშიჩის ბურთი მოიგერია ტრაპმა, ხოლო შემდეგ კი, ხრუსტიჩის დარტყმული რეინჯერსის კარს მცირე მანძილით აცდა.

120-ე წუთზე, კევინ ტრაპმა რაიან კენტს ახლო მანძილიდან ფეხით ურთულესი ბურთი, ხოლო 121-ე წუთზე კი, ჯეიმს ტავენიერის საჯარიმო დარტყმა აუღო.

ევროპა ლიგის გამარჯვებულის ვინაობა, ვერც დამატებითმა დრომ გამოავლინა და საქმე პენალტების სერიამდე მივიდა, სადაც აინტრახტმა 4-5 გაიმარჯვა. რეინჯერსის მხრიდან პენალტი აარონ რემზიმ გააფუჭა.

რაც შეეხება აინტრახტს, ფრანკფურტელებმა ეს ტიტული 1980 წლის შემდეგ, პირველად მოიგეს. მაშინ მათ ფინალში მიონხენგლადბახის ბორუსია დაამარცხეს.

ამრიგად აინტრახტმა ტიტულეთან ერთად, ჩემპიონთა ლიგაზე თამაშის უფლებაც მოიპოვა და მომავალ სეზონში ყველაზე პრესტიჟულ საკლუბო ტურნირზე ხუთი გერმანული კლუბი იასპარეზებს.

აინტრახტი ევროპა ლიგის ჩემპიონია

ევროპა ლიგის გამარჯვებულის ვინაობა პენალტების სერიამ გამოავლინა

უახლესი ამბები